دانالار ۋە ئەخمەقلەر
7
1 ياخشى نام خۇشبۇي مايدىن ئەۋزەلدۇر. بىر كىشىنىڭ ئۆلىدىغان كۈنى، ئۇنىڭ تۇغۇلغان كۈنىدىن ياخشىدۇر.
2 زىياپەت بولۇۋاتقان ئۆيگە كىرىشتىن ماتەم تۇتۇۋاتقان ئۆيگە كىرىش ياخشىدۇر. چۈنكى ھەممە ئادەملەرنىڭ ئاخىرى شۇنداق بولغاچقا، ھايات قالغان كىشى بۇنى كۆڭلىگە پۈكىدۇ.
3 غەم كۈلۈشتىن ياخشىدۇر، چۈنكى چىراي غەمكىن بولسا كۆڭۈل ياخشىلىنىدۇ.
4 دانالارنىڭ كۆڭلى ماتەم ئۆيىدىدۇر، لېكىن ئەخمەقلەرنىڭ كۆڭلى تاماشا ئۆيىدىدۇر.
5 دانالارنىڭ نەسىھەتىنى ئاڭلاش، ئەخمەقلەرنىڭ ناخشىسىنى ئاڭلاشتىن ياخشىدۇر.
6 ئەخمەقلەرنىڭ كۈلۈشى، قازاننىڭ ئاستىدىكى تىكەنلەرنىڭ چاراسلىشىدەكتۇر. بۇمۇ بىھۇدىلىكتۇر.
ھېكمەتنىڭ ئەۋزەللىكى
7 زۇلۇم دانانى ساراڭ قىلار،
پارا كۆڭۈلنى بۇزار.
8 ئىشنىڭ ئاخىرى ئۇنىڭ بېشىدىن ياخشىدۇر.
سەۋرچان كۆڭۈل تەكەببۇر كۆڭۈلدىن ياخشىدۇر.
9 كۆڭلۈڭدە ئالدىراپ خاپا بولما، چۈنكى خاپىلىق ئەخمەقلەرنىڭ قوينىدا ياتار. 10 «نېمىشقا ئۆتكەن كۈنلەر ھازىرقى كۈنلەردىن ياخشىدۇر؟» دەپ سورىمىغىن، چۈنكى ئۇنداق سورىغىنىڭ دانالىقتىن ئەمەس.
11 ھېكمەت مىراس كەبى ياخشىدۇر، كۈننى كۆرگەنلەر ئۈچۈن پايدىلىقتۇر. 12 چۈنكى ھېكمەت خۇددى پۇلدەك بىر پاناھتۇر، بىراق دانالىقنىڭ پايدىسى شۇكى، ھېكمەت ئۆز ئىگىسىنىڭ جېنىنى ساقلار.
13 خۇدانىڭ ئىشىنى ئويلاپ كۆر: ئۇ ئەگرى قىلغاننى كىم تۈز قىلالايدۇ؟
14 ياخشى كۈندە ھۇزۇرلانغىن، لېكىن يامان كۈن كەلسە: «ئىنسان ئۆزى كەتكەندىن كېيىن كۆرۈپ باقمىغان ئىشى قالمىغان بولسۇن دەپ، خۇدا بىرىنى يەنە بىرى بىلەن بىرلىكتە ياراتتى» دەپ ئويلانغىن. ■
خۇدادىن قورقۇش دانا بولۇشتىنمۇ ئەۋزەل
15 بىھۇدە ئۆتكەن كۈنلىرىمدە ھەر خىل ئىشنى كۆردۈم. بەزىدە ھەققانىي ئادەم ھەققانىيلىقىغا قارىماي، ئۆمۈر كۆرمەي ئۆلىدۇ، بەزىدە يامان كىشى يامانلىقىغا قارىماي، ئۇزۇن ئۆمۈر كۆرىدۇ.
16 نە زىيادە ھەققانىي، نە زىيادە دانا بولما. ئۆزۈڭنى پەرىشان قىلىشىڭنىڭ نېمە ھاجىتى بار؟
17 نە زىيادە يامان، نە زىيادە ئەخمەق بولما. ئەجىلىڭدىن بۇرۇن ئۆلىشىڭنىڭ نېمە ھاجىتى بار؟
18 بۇنى تۇتقىنىڭ ياخشى، شۇنىڭدەك ئۇنىڭدىنمۇ قولۇڭنى تارتمىغىن. چۈنكى خۇدادىن قورقىدىغان كىشى ھەر ئىككىسىدىن مۇۋەپپەقىيەت قازىنىدۇ.
19 ھېكمەت، دانا كىشىنى بىر شەھەرنىڭ ئون ھاكىمىدىن قۇدرەتلىك قىلىدۇ.
20 چۈنكى يەر يۈزىدە ياخشىلىق قىلىپ، ھېچ گۇناھ قىلمايدىغان ھەققانىي ئادەم يوقتۇر.
21 كىشىلەرنىڭ قىلغان ھەممە گەپلىرىگە ئېتىبار بېرىپ كەتمە، بولمىسا ئۆز خىزمەتكارىڭنىڭ ساڭا لەنەت ئوقۇغىنىنى ئاڭلاپ قېلىشىڭ مۇمكىن. 22 چۈنكى سېنىڭمۇ باشقىلارغا كۆپ قېتىم لەنەت ئوقۇغىنىڭنى ئۆز كۆڭلۈڭ بىلىدۇ.
ھېكمەتكە ئېرىشىشنىڭ تەسلىكى
23 بۇلارنىڭ ھەممىسىنى دانالىق بىلەن سىناپ باقتىم. دانا بولاي دېدىم، لېكىن ئۇ مەندىن يىراق ئىدى. 24 ئەقىل يەتمەيدىغان ۋە مەنىسى ناھايىتى چوڭقۇر ئىشلارنىڭ تېگىگە كىم يېتەلەيدۇ؟ 25 مەن ئىزدىنىشكە، تەپەككۇر قىلىشقا، ھېكمەت ۋە ئەقىل تېپىشقا، شۇنىڭدەك رەزىللىكنىڭ ئەخمەقلىق، ۋە ئەخمەقلىقنىڭ تەلۋىلىك ئىكەنلىكىنى بىلىشكە كۆڭۈل قويدۇم.
26 مەن ئۆلۈمدىن ئاچچىق بىر ئايالنى بايقىدىمكى، ئۇنىڭ كۆڭلى تور-تۇزاق، قوللىرى كىشەندۇر. خۇدانى خۇرسەن قىلغان كىشى ئۇنىڭدىن قېچىپ قۇتۇلار، لېكىن گۇناھكار ئۇنىڭغا تۇتۇلۇپ قالار.
27 مېنىڭ تاپقىنىمغا قارا، دەيدۇ ۋەز ئېيتقۇچى، مەنتىقىنى تېپىش ئۈچۈن ھەممىسى ئۈستىدە بىر-بىرلەپ ئىزدەنگىنىمدە: 28 مېنىڭ جېنىم ئىزدەپ تېخى تاپالمىغىنى شۇ: مىڭنىڭ ئارىسىدا بىر دۇرۇس ئادەمنى تاپتىم، لېكىن ھەممىسىنىڭ ئارىسىدا بىرمۇ دۇرۇس ئايالنى تاپالمىدىم. 29 لېكىن مانا، بۇنى تاپتىم: خۇدا ئىنساننى تۈز-دۇرۇس ياراتقان، لېكىن ئۇلار كۆپ ھىيلە-مىكىر ئويلاپ چىقار.