‏1 ئۇززىيا يەھۇداغا ۋە يوئاشنىڭ ئوغلى يەروبېئام ئىسرائىلغا پادىشاھ بولغان كۈنلىرىدە، يەر تەۋرەش ئاپىتىدىن ئىككى يىل ئىلگىرى تەقوئادىكى پادىچىلارنىڭ بىرى بولغان ئاموس دېگەن كىشىگە ئىسرائىل توغرىسىدا كەلگەن ۋەھىي.

‏2 ئاموس: «پەرۋەردىگار سىئوندىن گۈلدۈرلەپ، يېرۇسالېمدىن ئاۋازىنى كۆتۈرگەندە، پادىچىلارنىڭ يايلاقلىرى ماتەم تۇتىدۇ، كارمەلنىڭ چوققىسى قۇرۇپ كېتىدۇ» دېدى.

‏3 پەرۋەردىگار مۇنداق دەيدۇ: «دەمەشقنىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇلار گىلېئادنى خاماننىڭ تۆمۈر تۇلۇقى بىلەن دەسسىدى. ^■   ‏4 شۇنىڭ ئۈچۈن خازائەلنىڭ جەمەتى ئۈستىگە ئوت چۈشۈرىمەن. بۇ ئوت بەنھادادنىڭ ئوردىلىرىنى كۆيدۈرۈۋېتىدۇ. ‏5 مەن دەمەشقنىڭ دەرۋازىسىنىڭ بالداقلىرىنى سۇندۇرۇپ، ئاۋەن ۋادىسىدا تەختتە ئولتۇرغۇچىنى ۋە بەيت-ئېدەندە سەلتەنەت ھاسىسىنى تۇتقۇچىنى يوقىتىۋېتىمەن. ئارامنىڭ خەلقى ئەسىرگە چۈشۈپ، كىرگە ئېلىپ كېتىلىدۇ» دەيدۇ پەرۋەردىگار. ^■  

‏6 پەرۋەردىگار مۇنداق دەيدۇ: «گازانىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇلار خەلقنىڭ ھەممىسىنى ئەسىرگە ئېلىپ كېتىپ، ئېدومغا تاپشۇرۇپ بەردى. ‏7 شۇنىڭ ئۈچۈن گازانىڭ ئوردىلىرىنى كۆيدۈرۈۋېتىدىغان بىر ئوتنى ئۇنىڭ سېپىللىرى ئۈستىگە چۈشۈرىمەن. ‏8 مەن ئاشدود شەھىرىدە تەختتە ئولتۇرغۇچىنى ۋە ئاشقېلون شەھىرىدە سەلتەنەت ھاسىسىنى تۇتقۇچىنى يوقىتىۋېتىمەن. مەن ئەقرون شەھىرىگە قارشى قولۇمنى كۆتۈرىمەن. فىلىستىنلەرنىڭ قالغانلىرى ھالاك بولىدۇ»، دەيدۇ رەب پەرۋەردىگار.

‏9 پەرۋەردىگار مۇنداق دەيدۇ: «تىرنىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇلار قېرىنداشلىق ئەھدىسىنى ئېسىدا تۇتماي، خەلقنىڭ ھەممىسىنى ئەسىرگە ئېلىپ كېتىپ، ئېدومغا تاپشۇرۇپ بەردى. ‏10 شۇنىڭ ئۈچۈن تىرنىڭ ئوردىلىرىنى كۆيدۈرۈۋېتىدىغان بىر ئوتنى ئۇنىڭ سېپىللىرى ئۈستىگە چۈشۈرىمەن».

‏11 پەرۋەردىگار مۇنداق دەيدۇ: «ئېدومنىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇ ھەممە رەھىم-شەپقىتىنى تاشلىۋېتىپ، ئۆز قېرىندىشىنى قىلىچ بىلەن قوغلىدى. ئۇ غەزىپىنى يىغماي زۇلۇم سېلىۋەردى، ئاچچىقىدىن يانماي، توختىماستىن ئۇنىڭغا ھۇجۇم قىلىۋەردى. ‏12 شۇنىڭ ئۈچۈن بوزرانىڭ ئوردىلىرىنى كۆيدۈرۈۋېتىدىغان بىر ئوتنى تېما شەھىرى ئۈستىگە چۈشۈرىمەن».

‏13 پەرۋەردىگار مۇنداق دەيدۇ: «ئاممونىيلارنىڭ ئۈچ گۇناھى، بەرھەق تۆت گۇناھى سەۋەبىدىن ئۇلارنى جازاسىز قويمايمەن، چۈنكى ئۇلار ئۆز زېمىنىنى كەڭەيتىمىز دەپ، گىلېئادتىكى ھامىلىدار ئاياللارنىڭ قورساقلىرىنى يېرىۋەتتى. ‏14 شۇنىڭ ئۈچۈن جەڭ كۈنىدە چۇقان كۆتۈرۈلگەندە، قارا قۇيۇن كۈنىدە قاتتىق بوران چىققاندا، راببانىڭ سېپىللىرى ئىچىدە ئۇنىڭ ئوردىلىرىنى كۆيدۈرۈۋېتىدىغان بىر ئوت ياقىمەن. ‏15 ئۇلارنىڭ پادىشاھى ھەممە ئەمەلدارلىرى بىلەن قوشۇلۇپ ئەسىرگە ئېلىپ كېتىلىدۇ» دەيدۇ پەرۋەردىگار.