‏1 پەرۋەردىگار مۇنداق دەيدۇ: «موئابنىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇ ئېدوم پادىشاھىنىڭ سۆڭەكلىرىنى كۆيدۈرۈپ، ھاككا ئايلاندۇردى. ‏2 شۇنىڭ ئۈچۈن قىرىيوتنىڭ ئوردىلىرىنى كۆيدۈرۈۋېتىدىغان بىر ئوتنى موئابنىڭ ئۈستىگە چۈشۈرىمەن. شىددەتلىك جەڭدە غەلىبە چۇقانى كۆتۈرۈلگەندە ۋە بۇرغا ئاۋازى ئاڭلانغاندا موئاب ھالاك بولىدۇ. ^■   ‏3 مەن ئۇلارنىڭ ئارىسىدىن ھۆكۈمدارىنى يوق قىلىپ، ھەممە ئەمەلدارلىرىنى ئۇنىڭغا قوشۇپ ئۆلتۈرۈۋېتىمەن» دەيدۇ پەرۋەردىگار.

‏4 پەرۋەردىگار مۇنداق دەيدۇ: «يەھۇدانىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇلار پەرۋەردىگارنىڭ تەۋرات قانۇنىنى تاشلاپ، ئۇنىڭ بەلگىلىمىلىرىگە ئەمەل قىلمىدى. ئۇلارنىڭ ئاتا-بوۋىلىرى كەينىدىن ئەگەشكەن يالغان ئىلاھلىرى ئۇلارنى ئازدۇرۇپ كەتتى. ^■   ‏5 شۇنىڭ ئۈچۈن يېرۇسالېمنىڭ ئوردىلىرىنى كۆيدۈرۈۋېتىدىغان بىر ئوتنى يەھۇدانىڭ ئۈستىگە چۈشۈرىمەن».

‏6 پەرۋەردىگار مۇنداق دەيدۇ: «ئىسرائىلنىڭ ئۈچ گۇناھى، بەرھەق تۆت گۇناھى سەۋەبىدىن ئۇنى جازاسىز قويمايمەن، چۈنكى ئۇلار ھەققانىيلارنى پۇلغا ساتىدۇ ۋە كەمبەغەللەرنى بىر جۈپ چورۇققا تېگىشىدۇ. ‏7 ئۇلار نامراتلارنىڭ باشلىرىنى توپىغا مىلەيدۇ، كەمتەر-مۇلايىملارنىڭ يولىنى توسۇۋالىدۇ. ئاتا-بالا ئىككىلىسى بىر ئايالنىڭ يېنىغا بېرىپ، مېنىڭ مۇقەددەس نامىمنى بۇلغايدۇ. ‏8 ئۇلار ھەر قۇربانلىق سۇپىسىنىڭ يېنىدا گۆرۈگە قويۇلغان كىيىملەر بىلەن ياتىدۇ، ئۆزلىرىگە توپلىغان جەرىمانە پۇلى بىلەن ئالغان شارابنى ئۆز خۇداسىنىڭ بەيتىدە ئىچىدۇ. ^■   ‏9 مەن بولسام، ئۇلارنىڭ كۆز ئالدىدا، ئۆزى كېدىر دەرىخىدەك ئېگىز، دۇب دەرىخىدەك مۇستەھكەم بولغان ئامورىيلارنى يوقىتىۋېتىپ، ئۈستىدىن مېۋىسىنى، ئاستىدىن يىلتىزلىرىنى ھالاك قىلدىم ئەمەسمۇ؟ ‏10 مەن ئامورىيلارنىڭ زېمىنىنى ئىگىلىسىلەر دەپ سىلەرنى مىسىر زېمىنىدىن ئېلىپ چىقىپ، چۆل-باياۋاندا قىرىق يىل يېتەكلىدىم ئەمەسمۇ؟ ‏11 مەن ئوغۇللىرىڭلارنىڭ ئىچىدىن بەزىلىرىنى پەيغەمبەر، ياشلىرىڭلارنىڭ ئارىسىدىن بەزىلىرىنى خۇداغا ئاتالغان نازارىي بولۇشقا تاللىدىم ئەمەسمۇ، ئەي بەنى ئىسرائىل؟» دەيدۇ پەرۋەردىگار. ^■   ‏12 «لېكىن سىلەر خۇداغا ئاتالغان نازارىيلارغا شاراب ئىچۈردۈڭلار، پەيغەمبەرلەرگە: ‹پەيغەمبەرلىك قىلماڭلار› دەپ بۇيرۇدۇڭلار. ‏13 مانا، شۇنىڭ ئۈچۈن مەن سىلەرنى بۇغداي باغلاملىرى بېسىلغان ھارۋا يەرنى باسقاندەك، سىلەرنى بېسىپ ئېزىۋېتىمەن. ‏14 ئۇ چاغدا چاققانلار قېچىشقا يول تاپمايدۇ، كۈچلۈك كىشىلەردە كۈچ قالمايدۇ ۋە ھەتتا پالۋانلارمۇ ئۆز جېنىنى قۇتقۇزالمايدۇ. ‏15 ئوقياچىلار تىك تۇرالمايدۇ، تېز يۈگۈرگۈچىلەر قاچالمايدۇ، ئاتقا مىنگۈچىلەرمۇ ئۆز جېنىنى قۇتقۇزالمايدۇ. ‏16 پالۋانلار ئىچىدىن ئەڭ باتۇرى ئۇ كۈنى يالىڭاچ قېچىپ كېتىدۇ» دەيدۇ پەرۋەردىگار.