‏1 «ئەي بەنى ئىسرائىل، پەرۋەردىگار سىلەرگە قارشى ئېيتقان، يەنى مەن ئۆزۈم مىسىر زېمىنىدىن ئېلىپ چىققان ھەممە شۇ نەسىلگە قارشى ئېيتقان بۇ سۆزنى ئاڭلاڭلار: ‏2 مەن يەر يۈزىدىكى بارلىق جەمەتلەرنىڭ ئىچىدىن پەقەت سىلەرنى تاللىدىم ئەمەسمۇ؟ شۇنىڭ ئۈچۈن سىلەرگە بارلىق يامانلىقلىرىڭلارنىڭ جازاسىنى بېرىمەن.

‏3 بىر نىيەتتە بولمىغان ئىككى كىشى بىللە ماڭالامدۇ؟ ‏4 ئوۋ تاپمىغان بىر شىر جاڭگالدا ھۆركىرەمدۇ؟ ئوۋ تۇتمىغان ئارسلان ئۇۋىسىدا ھۇۋلامدۇ؟ ‏5 يەرگە قويۇلغان قاپقاننىڭ يەمچۈكى بولمىسا، بىر قۇشقاچ قاپقانغا چۈشەمدۇ؟ بىر نېمىنى تۇتقان بولمىسا، قاپقان يەردىن سەكرەپ كۆتۈرۈلەمدۇ؟ ‏6 شەھەردە بۇرغا چېلىنسا، خەلق قورقماي قالامدۇ؟ پەرۋەردىگار ئەۋەتمىسە، شەھەرگە بىر بالايىئاپەت كېلەمدۇ؟ ‏7 دەرھەقىقەت، رەب پەرۋەردىگار ئۇنىڭ خىزمەتكارلىرى بولغان پەيغەمبەرلەرگە نىيىتىنى ئاشكارىلىمىغۇچە بىر ئىش قىلمايدۇ. ‏8 شىر ھۆركىرەپ تۇرسا، كىم قورقمايدۇ؟ رەب پەرۋەردىگار سۆزلىسە، كىم ئۇنىڭ بېشارىتىنى يەتكۈزمەي تۇرالايدۇ؟»

‏9 «ئاشدودنىڭ ئوردىلىرى ۋە مىسىر زېمىنىنىڭ ئوردىلىرىدا ئېلان قىلىڭلار: ‹سامارىيە تاغلىرىغا يىغىلىپ، شەھەردىكى قالايمىقانچىلىقنى كۆرۈپ بېقىڭلار، ئۇنىڭ ئىچىدىكى زۇلۇملارغا نەزەر سېلىڭلار›. ‏10 چۈنكى ئۇلار زوراۋانلىق ۋە بۇلاڭچىلىق بىلەن تاپقانلىرىنى ئۆز ئوردىلىرىدا يىغىپ، ياخشىلىق قىلىشنى ھېچ بىلمەيدۇ» دەيدۇ پەرۋەردىگار. ‏11 شۇڭا رەب پەرۋەردىگار مۇنداق دەيدۇ: «ھەر تەرەپتىن دۈشمەن زېمىنغا بېسىپ كىرىپ، سېنىڭ قەلئە-قورغانلىرىڭنى ۋەيران قىلىپ، ئوردا-سارايلىرىڭنى بۇلاڭ-تالاڭ قىلىدۇ». ^■  

‏12 پەرۋەردىگار مۇنداق دەيدۇ: «بىر پادىچى قوينىڭ ئىككى پاچىقىنى ياكى قۇلىقىنىڭ بىر پارچىسىنىلا شىرنىڭ ئاغزىدىن ئاجرىتىۋالغاندەك، سامارىيەدە سۇپىنىڭ بۇرجىكىدە، يۇمشاق كۆرپىسىنىڭ ئۈستىدە ئولتۇرغان بەنى ئىسرائىل قۇتقۇزۇلىدۇ».

‏13 «قۇلاق سېلىڭلار، ياقۇب جەمەتىگە قارشى گۇۋاھلىق بېرىڭلار» دەيدۇ رەب پەرۋەردىگار، ساماۋى قوشۇنلارنىڭ سەردارى خۇدا. ‏14 «مەن ئىسرائىلغا يامان ئىشلىرى ئۈچۈن جازا بەرگەن كۈندە بەيتەلدىكى قۇربانلىق سۇپىلارغىمۇ جازا بېرىمەن. قۇربانلىق سۇپىسىنىڭ مۈڭگۈزلىرى كېسىلىپ، يەرگە چۈشۈرۈلىدۇ. ‏15 مەن قىشلىق ساراي ۋە يازلىق ساراينى بۇزۇپ چاقىمەن. پىل چىشى بىلەن بېسەلگەن ئۆيلەر ۋەيران بولىدۇ، كۆپلىگەن ئۆيلەر ئۆرۈلۈپ يوق بولۇپ كېتىدۇ» دەيدۇ پەرۋەردىگار. ^■