‏1 ئەي ئىسرائىل جەمەتىدىن بولغانلار، مەن سىلەر ھەققىدە ئوقۇيدىغان مەرسىيەنى ئاڭلاڭلار:

‏2 «ئىسرائىل قىزى يىقىلىپ چۈشۈپ، يەنە ئورنىدىن تۇرالماس.

ئۇ ئۆز يۇرتىدا يەردە يېتىپ قالدى،

ئۇنى يۆلەپ تۇرغۇزىدىغان كىشى تېپىلماس».

‏3 چۈنكى رەب پەرۋەردىگار مۇنداق دەيدۇ: «ئىسرائىل جەمەتىگە شۇنداق بولىدۇكى، بىر شەھىرىدىن مىڭ كىشى جەڭگە چىقسا ئۇلاردىن يۈز كىشىلا ساق قالىدۇ، يەنە بىر شەھىرىدىن يۈز كىشى جەڭگە چىقسا، ئۇلاردىن ئون كىشىلا ساق قالىدۇ».

‏4 چۈنكى پەرۋەردىگار ئىسرائىل جەمەتىگە مۇنداق دەيدۇ: «مېنى ئىزدىسەڭلار، ياشايسىلەر. ‏5 لېكىن بەيتەلنى ئىزدىمەڭلار، گىلگالغا كىرمەڭلار، بەئەرشېباغىمۇ بارماڭلار، چۈنكى گىلگال شەكسىز سۈرگۈن قىلىنىدۇ ۋە بەيتەل يوق بولۇپ كېتىدۇ. ‏6 پەرۋەردىگارنى ئىزدىسەڭلار، ياشايسىلەر. بولمىسا، ئۇ بىر ئوتتەك كېلىپ، يۈسۈپ جەمەتىگە تۇتىشىپ ئۇنى كۆيدۈرۈۋېتىدۇ. ئۇ چاغدا ئوتنى ئۆچۈرۈپ بەيتەلنى قۇتقۇزىدىغان ئادەم تېپىلماس».

‏7 «ئەي ئادالەتنى ئاچچىق ئەمەنگە ئايلاندۇرغۇچىلار! ئەي ھەققانىيلىقنى يەرگە تاشلىغۇچىلار! ‏8 سىلەر ئۈكەر يۇلتۇز تۈركۈمى ۋە ئورىئون يۇلتۇز تۈركۈمىنى ياراتقۇچى، ئۆلۈم سايىسىنى تاڭ نۇرىغا ئايلاندۇرغۇچى، كۈندۈزنى زۇلمەت كېچە قىلغۇچى، دېڭىزنىڭ سۈيىنى چاقىرىپ، يەر يۈزىگە سەپكۈچىنى ئىزدەڭلار. پەرۋەردىگار ئۇنىڭ نامىدۇر. ‏9 ئۇ باتۇرلار ئۈستىگە ھالاكەتلىك چاقماق چۈشۈرىدۇ، قورغانلارنى ۋەيران قىلىدۇ. ‏10 ئىسرائىل خەلقى بولسا شەھەر دەرۋازىسىدا تۇرغان نەسىھەت بەرگۈچىگە ئۆچ بولۇپ، ھەق سۆزلىگۈچىلەرنى يامان كۆرىدۇ.

‏11 «سىلەر بىچارىلەرنى ئېزىپ، ئۇلارنىڭ ئاشلىقىنى ئالۋانغا ئالغىنىڭلار ئۈچۈن، سىلەر يونۇلغان تاشلاردىن ياسالغان ئۆيلىرىڭلاردا ئولتۇرالماي قالىسىلەر، ياخشى ئۆستۈرگەن ئۈزۈمزارلىقلىرىڭلارنىڭ شارابىنى ئىچەلمەيسىلەر. ‏12 چۈنكى مەن يامان ئىشلىرىڭلارنىڭ كۆپلۈكىنى، گۇناھلىرىڭلارنىڭ جىقلىقىنى بىلىمەن. سىلەر ھەققانىيلارنى ئېزىپ، پارا ئېلىپ، شەھەر دەرۋازىسىدا تۇرۇپ مىسكىنلەرنىڭ ھەق-ھوقۇقىنى دەپسەندە قىلىسىلەر. ‏13 بۇنداق دەۋر يامان دەۋر بولغاچقا، ئەقىل-پارەسەتلىك كىشى شۈك تۇرىدۇ».

‏14 ياشىماقچى بولساڭلار، يامانلىق قىلماي، ياخشىلىقنى ئىزدەڭلار. شۇنداق قىلساڭلار، سىلەر دېگىنىڭلاردەك ساماۋى قوشۇنلارنىڭ سەردارى پەرۋەردىگار خۇدا سىلەرگە يار بولىدۇ. ‏15 يامانلىقنى يامان كۆرۈپ ياخشىلىقنى سۆيۈڭلار. شەھەر دەرۋازىسىدا ئادالەتنى ياقلاڭلار. شۇنداق قىلساڭلار، بەلكىم ساماۋى قوشۇنلارنىڭ سەردارى پەرۋەردىگار خۇدا يۈسۈپنىڭ قالغانلىرىغا مەرھەمەت كۆرسىتەر. ‏16 شۇڭا ساماۋى قوشۇنلارنىڭ سەردارى پەرۋەردىگار خۇدا، بىزنىڭ ئىگىمىز، مۇنداق دەيدۇ: «ھەممە بازارلاردا ماتەم تۇتۇلىدۇ، ھەممە قوچىلاردا ‹ۋاي، ۋاي› دەپ نالە قىلىنىدۇ. ئۇلار دېھقانلارنى يىغا-زار قىلىشقا، مەرسىيە ئوقۇشقا ئۇستا بولغانلارنى يىغلاشقا چاقىرىدۇ. ‏17 ھەممە ئۈزۈمزارلىقلاردا يىغا-زار كۆتۈرۈلىدۇ، چۈنكى مەن ئاراڭلاردىن ئۆتۈپ كېتىمەن» دەيدۇ پەرۋەردىگار. ^■  

‏18 «ئەي پەرۋەردىگارنىڭ كۈنىنى ئارزۇ قىلىپ كۈتكەنلەر، ھالىڭلارغا ۋاي! پەرۋەردىگارنىڭ كۈنىنى نېمىشقا ئارزۇ قىلىپ كۈتىسىلەر؟ ئۇ كۈن يورۇقلۇق ئەمەس، قاراڭغۇلۇق ئېلىپ كېلىدۇ. ‏19 ئۇ كۈنى بىر كىشى بىر شىردىن قېچىپ، بىر ئېيىققا ئۇچراپ قالغاندەك ياكى ئۆيگە بېرىپ قولى بىلەن تامغا يۆلەنگەندە يىلان ئۇنى چېقىۋالغاندەك ئەھۋال بولىدۇ. ‏20 پەرۋەردىگارنىڭ كۈنى يورۇقلۇقنى ئەمەس، قاراڭغۇلۇقنى ئېلىپ كېلىدۇ ئەمەسمۇ؟ ئۇ كۈن يورۇق ئەمەس، قاپ-قاراڭغۇ بولىدۇ».

‏21 «مەن ھېيتلىرىڭلارنى يامان كۆرۈپ، ئۇلاردىن نەپرەتلىنىمەن. ھېيت يىغىلىشلىرىڭلاردىن بىزار بولدۇم. ‏22 سىلەر ماڭا كۆيدۈرمە قۇربانلىق ۋە ئاشلىق ھەدىيەلىرىڭلارنى سۇنساڭلارمۇ، مەن بۇلاردىن رازى بولمايمەن، بورداق مالدىن ئامانلىق قۇربانلىقىنى سۇنساڭلارمۇ ئۇلارغا خۇرسەنلىك بىلەن قارىمايمەن. ‏23 ناخشىلىرىڭلارنىڭ چۇقىنىنى مەندىن نېرى قىلىڭلار. مەن چىلتارلىرىڭلارنىڭ ئۈنىنى ئاڭلاشنى خالىمايمەن. ‏24 لېكىن ئادالەتنى سۇدەك ۋە ھەققانىيلىقنى كۈچلۈك ئېقىندەك ئېقىتىڭلار.

‏25 ئەي ئىسرائىل جەمەتى، چۆل-باياۋاندا قىرىق يىل داۋامىدا ماڭا قۇربانلىق ۋە ھەدىيەلەرنى سۇندۇڭلارمۇ؟ ‏26 مانا، مولەك بۇتىنىڭ چېدىرىنى ۋە ئۆزۈڭلار ياسىغان يۇلتۇز ئىلاھىڭلارنىڭ بۇت ھەيكەللىرىنى كۆتۈرۈپ ماڭدىڭلار.

‏27 شۇنىڭ ئۈچۈن مەن سىلەرنى دەمەشقتىنمۇ يىراق يەرلەرگە سۈرگۈن قىلىمەن» دەيدۇ ساماۋى قوشۇنلارنىڭ سەردارى خۇدا دەپ ئاتالغان پەرۋەردىگار.