‏1 پەرۋەردىگار يۇنۇسنى يۇتۇۋېلىشقا چوڭ بىر بېلىقنى ئەۋەتكەنىدى. يۇنۇس ئۈچ كېچە-كۈندۈز بۇ بېلىقنىڭ قورسىقىدا تۇرۇپ قالدى. ‏2 يۇنۇس بېلىقنىڭ قورسىقىدا تۇرۇپ، ئۆز خۇداسى پەرۋەردىگارغا دۇئا قىلدى. ‏3 ئۇ مۇنداق دېدى:

«مەن دەرد-ئەلەم ئىچىدە پەرۋەردىگارغا يېلىنىپ دۇئا قىلدىم،

ئۇ ماڭا قۇلاق سالدى.

ئۆلۈكلەر دىيارىنىڭ قورسىقىدىن پەرياد قىلدىم،

سەن ئاۋازىمغا قۇلاق سالدىڭ.

‏4 سەن مېنى چوڭقۇر دېڭىزنىڭ قارنىغا تاشلىغىنىڭدا

سۇ ئېقىنلىرى كېلىپ مېنى بېسىۋالدى.

سېنىڭ ھەممە ئۆركەشلەپ ئاقىدىغان دولقۇنلىرىڭ

كۆتۈرۈلۈپ ئۈستۈمدىن ئۆتۈپ كەتتى.

‏5 ئۇ پەيتتە مەن: ‹مەن نەزىرىڭدىن تاشلىنىپ كەتتىم.

سېنىڭ مۇقەددەس ئىبادەتخاناڭنى يەنە كۆرەرمەنمۇ؟› دېدىم.

‏6 سۇلار مېنى بوغقۇدەك قورشىۋالدى،

چوڭقۇر سۇلار مېنى يۆگىۋالدى.

دېڭىزنىڭ ئوت-چۆپلىرى بېشىمغا چىرمىشىۋالدى.

‏7 مەن تاغلارنىڭ ئۇللىرىغىچە چۈشۈپ كېتىپ،

يەرنىڭ دەرۋازىلىرى مەڭگۈگە ماڭا يېپىلدى.

لېكىن، سەن، ئەي پەرۋەردىگار خۇدايىم،

مېنىڭ جېنىمنى ھاڭدىن قۇتقۇزۇۋالدىڭ.

‏8 ئۆلەي دەپ قالغىنىمدا پەرۋەردىگارنى ياد ئەتتىم،

مېنىڭ دۇئايىم مۇقەددەس بەيتىڭگە،

سېنىڭ ھۇزۇرۇڭغا يەتتى.

‏9 يالغان ئەرزىمەس بۇتلارغا چوقۇنغانلار

ئۆزىگە تېگىشى مۇمكىن بولغان مېھىر-شەپقەتتىن مەھرۇم قالىدۇ.

‏10 لېكىن مەن ئۈنلۈك ئاۋاز بىلەن ساڭا شۈكۈر ئېيتىپ،

سەن ئۈچۈن قۇربانلىق قىلىپ،

بەرگەن ۋەدىلىرىمنى ئەمەلگە ئاشۇرىمەن،

چۈنكى نىجاتلىق پەرۋەردىگاردىندۇر».

‏11 پەرۋەردىگارنىڭ بۇيرۇقى بىلەن بېلىق يۇنۇسنى قۇرۇقلۇققا قۇسۇپ چىقاردى.