‏1 «ئەمدى، ئەي كاھىنلار، بۇ ھۆكۈم سىلەر ئۈچۈندۇر: ‏2 سىلەر قۇلاق سالمىساڭلار ۋە مېنىڭ نامىمغا شان-شەرەپ كەلتۈرۈشكە كۆڭۈل قويمىساڭلار، مەن ئۈستۈڭلارغا لەنەت ياغدۇرىمەن ۋە ھەممە بەرىكەتلىرىڭلارنى لەنەتكە ئايلاندۇرىمەن. بەرھەق، بۇنىڭغا كۆڭۈل قويمىغىنىڭلار ئۈچۈن مەن بۇلارنى لەنەتكە ئايلاندۇردۇم» دەيدۇ ساماۋى قوشۇنلارنىڭ سەردارى پەرۋەردىگار. ‏3 «مانا، مەن نەسلىڭلارنى جازالايمەن، ھېيت قۇربانلىقىڭلارنىڭ ناپاك نىجاسىتىنى يۈزۈڭلارغا چېچىۋېتىمەن. سىلەر شۇ نىجاسەت بىلەن بىللە ئېلىپ كېتىلىسىلەر. ‏4 ئۇ ۋاقىتتا سىلەر مېنىڭ لاۋىي بىلەن تۈزگەن ئەھدەمنىڭ ساقلىنىپ قېلىشى ئۈچۈن مەن بۇ ھۆكۈمنى ئەۋەتكىنىمنى بىلىسىلەر» دەيدۇ ساماۋى قوشۇنلارنىڭ سەردارى پەرۋەردىگار. ^■   ‏5 «ئۇنىڭ بىلەن تۈزگەن ئەھدەم ھاياتلىق ۋە ئامانلىق ئەھدىسى ئىدى. ئۇ مەندىن قورقسۇن دەپ، ئۇنىڭغا بۇ ئەھدىنى بەردىم. ئۇ مەندىن قورقۇپ مېنىڭ نامىمدىن تىترىدى. ‏6 ئۇنىڭ ئاغزىدىن توغرا تەۋرات تەلىمى چىقتى، ئۇنىڭ لەۋلىرىدە ناھەقلىق تېپىلمىدى. ئۇ مېنىڭ ئالدىمدا ھاياتىنى تىنچ-ئامان ئۆتكۈزۈپ، دۇرۇس مېڭىپ، نۇرغۇن كىشىلەرنى يامان يوللىرىدىن ياندۇردى. ^■   ‏7 كاھىن ساماۋى قوشۇنلارنىڭ سەردارى پەرۋەردىگارنىڭ ئەلچىسى بولغاچقا، ئۇنىڭ لەۋلىرى مەرىپەتنى ساقلايدۇ ۋە خەلق ئۇنىڭ ئاغزىدىن تەۋرات تەلىمىنى كۈتىدۇ.

‏8 لېكىن سىلەر يولدىن چەتنەپ كېتىپ، تەلىملىرىڭ بىلەن نۇرغۇن كىشىلەرنى پۇتلاشتۇرۇپ يىقىتىۋەتتىڭلار. لاۋىي بىلەن تۈزگەن ئەھدەمنى بۇزۇۋەتتىڭلار» دەيدۇ ساماۋى قوشۇنلارنىڭ سەردارى پەرۋەردىگار، ‏9 «شۇنىڭ ئۈچۈن مەن سىلەرنى ھەممە خەلقنىڭ نەزىرىدە ئېتىبارسىز قىلىپ، خارلىققا سالدىم، چۈنكى سىلەر مېنىڭ يوللىرىمنى ساقلىماي، تەۋرات قانۇنىنى ئۆگىتىشتە ئايرىمىچىلىق قىلدىڭلار».

‏10 ھەممىمىزنىڭ ئاتىمىز بىر ئەمەسمۇ؟ بىزنى ياراتقان خۇدايىمىز بىر ئەمەسمۇ؟ ئۇنداق بولسا، بىز نېمىشقا ئۆز قېرىنداشلىرىمىزغا ۋاپاسىزلىق قىلىپ، ئاتا-بوۋىلىرىمىز بىلەن تۈزۈلگەن ئەھدىنى بۇزىمىز؟ ^■   ‏11 يەھۇدا ۋاپاسىزلىق قىلىپ، ئىسرائىلدا ۋە يېرۇسالېمدا يىرگىنچلىك ئىشلار قىلدى. چۈنكى يەھۇدا يات ئىلاھنىڭ قىزىنى خوتۇنلۇققا ئېلىپ، پەرۋەردىگارنىڭ سۆيگەن مۇقەددەس جايىنى بۇلغىدى. ^■   ‏12 شۇنداق ئىش قىلغۇچىنى، مەيلى ئازدۇرغۇچى بولسۇن، ئازدۇرۇلغۇچى بولسۇن ياكى پەرۋەردىگارغا ھەرقانداق ھەدىيە سۇنغان كىشى بولسۇن، ساماۋى قوشۇنلارنىڭ سەردارى پەرۋەردىگار ياقۇبنىڭ چېدىرلىرىدىن يوقىتىدۇ.

‏13 سىلەر يەنە شۇنداق قىلىسىلەر: سىلەر نالا-پەرياد قىلىپ پەرۋەردىگارنىڭ قۇربانلىق سۇپىسىنى كۆز ياشلىرىڭلار بىلەن قاپلايسىلەر، چۈنكى ئۇ قۇربانلىقلىرىڭلارغا نەزەر سالمايدىغان، قولۇڭلارنىڭ ھەدىيەلىرىنى قوبۇل قىلمايدىغان بولدى. ‏14 سىلەر يەنىلا: «بۇنىڭ سەۋەبى نېمە؟» دەپ سورايسىلەر. مانا، سەۋەب شۇكى، پەرۋەردىگار سەن بىلەن ياشلىقىڭدا ئالغان ئايالىڭنىڭ ئوتتۇرىسىدا گۇۋاخ بولۇپ، ئايال سېنىڭ نىكاھلانغان ئايالىڭ بولسىمۇ، ئۇنىڭغا ۋاپاسىزلىق قىلغىنىڭنى كۆردى. ^■   ‏15 ئۇ ئەر-ئايالنى بىر قىلغان ئەمەسمۇ؟ روھىنى ئۇلارغا قالدۇرغان ئەمەسمۇ؟ نېمە سەۋەبتىن؟ ئۇ خۇداغا لايىق بىر نەسىل پەيدا بولۇشنى خالىدى. شۇنىڭ ئۈچۈن، قەلبىڭلارنى پاك ساقلاڭلار، ھېچبىرىڭلار ياشلىقتا ئالغان ئايالغا ۋاپاسىزلىق قىلماڭلار. ^■   ‏16 چۈنكى ئىسرائىلنىڭ خۇداسى پەرۋەردىگار مۇنداق دەيدۇ: «مەن تالاق قىلىشنى يامان كۆرىمەن». «يېپىنچىسىنى ئاھانەت بىلەن قاپلانغان كىشىدىن نەپرەتلىنىمەن» دەيدۇ ساماۋى قوشۇنلارنىڭ سەردارى پەرۋەردىگار، «شۇڭا قەلبىڭلارنى پاك ساقلاپ، ۋاپاسىزلىق قىلماڭلار».

‏17 سىلەر گەپلىرىڭلار بىلەن پەرۋەردىگارنى ھارغۇزۇۋەتتىڭلار. يەنىلا سىلەر: «قانداق قىلىپ ئۇنى ھارغۇزۇۋەتتۇق؟» دەپ سورايسىلەر. سىلەر: «يامانلىق قىلغۇچىلار پەرۋەردىگارنىڭ نەزىرىدە ياخشىدۇر، ئۇ ئۇلاردىن خۇرسەن بولىدۇ» ۋە يەنە: «ئادالەتنىڭ خۇداسى قېنى؟» دېگىنىڭلار بىلەن ئۇنى ھارغۇزدىڭلار ئەمەسمۇ؟