105
1 Perwerdigargha shükür éytinglar, Uning namini chaqirip du’a qilinglar,
xelqler arisida Uning ishlirini bayan qilinglar.
2 Uni küylenglar.
Medhiye naxshilirini éytip,
Uning hemme ajayip ishlirini bayan qilinglar.
3 Uning muqeddes namidin pexirlininglar.
Perwerdigarni izdigüchilerning köngli shadlansun.
4 Perwerdigarni we Uning qudritini izdenglar,
Toxtimay Uning didarigha intilinglar.
5 Uning qilghan ajayip ishliri we karametlirini,
aghzidin chiqqan hökümlirini este tutunglar.
6 Ey Uning xizmetkari bolghan Ibrahimning uruq-ewladi,
ey Uning tallanghan xizmetkari Yaqubning baliliri!
7 U Perwerdigardur, bizning Xudayimizdur,
Uning hökümliri pütkül yer yüzini qapsaydu.
8 U Öz ehdini ebediy éside tutidu,
ming nesilge buyrughan sözini,
9 Ibrahim bilen tüzgen ehdini,
Is’haqqa ichken qesimini yadida saqlaydu.
10 U buni Yaqubqa nizam qilip békitip,
Isra’ilgha menggülük ehde qilip bérip:
11 «Ken’an zéminini sanga bérimen,
uni miras nésiweng qilip bérimen» dédi.
12 U chaghda ular nahayiti az sanliq idi,
hem u yerde musapir idi.
13 Ular eldin elge köchüp,
bir padishahliqtin yene bir padishahliqqa yötkilip yüretti.
14 Shundaq bolsimu, Perwerdigar
héchkimning ulargha zulum qilishigha yol qoymidi,
ularning xatirisini qilip, padishahlarni qorqutti:
15 «Méning tallap mesihligenlirimge héch qol tegküzmenglar,
peyghemberlirimge yamanliq qilmanglar» dédi.
16 U shu zémingha acharchiliq ewetip,
hemme ashliqini qurutuwetti.
17 U ulardin awwal bir ademni ewetkenidi:
u qul qilip sétilghan Yüsüp idi.
18 Uning putliri zenjirlendi,
uning boynigha tömür halqilar baghlandi.
19 Uning toghrisidiki bésharet emelge ashuruldi,
Perwerdigarning sözi uni sinaqlardin ötküzüp tawlidi.
20 Padishah kishi ewetip uni qoyuwetti,
xelqlerning hökümrani uni azad qildi.
21 U uni öz öyige xoja qildi,
pütün mal-mülkige mes’ul qildi.
22 Öz wezirlirini uning ixtiyari boyiche terbiyileshke
we aqsaqallirigha ilim ögitishke uni teyinlidi.
23 Shuningdin kéyin Isra’ilmu Misirgha keldi,
Yaqub Xamning zéminida musapir bolup yashidi.
24 Emma Perwerdigar Öz xelqini awutup köpeytti,
ularni düshmenliridin küchlük qildi.
25 U Misirliqlarning köngüllirini özgertti.
U ularning Öz xelqidin nepretlinishige,
Öz xizmetkarlirigha hiyle-mikir bilen mu’amile qilishigha yol qoydi.
26 U Öz xizmetkari Musa
we Özi tallighan Harunni ulargha ewetti.
27 Ular ularning arisida Uning karametlirini,
Xam zéminida Uning möjizilirini körsetti.
28 U qarangghuluq ewetip zéminni qarangghu qildi.
Ular Uning sözige qarshi turmidi.
29 U ularning sulirini qangha aylandurup,
béliqlirini öltürüwetti.
30 Paqilar ularning zéminini basti,
ular hetta padishahning öylirigiche bésip kirdi.
31 Uning sözi bilen sanaqsiz chiwinlar yétip keldi,
pashilar ularning pütün zéminini qaplidi.
32 U yamghurning ornigha möldür yaghdurdi,
ularning zéminigha ot yalqunlirini chüshürdi.
33 U üzüm talliri we enjür derexlirini weyran qildi,
ularning zéminidiki derexlerni sunduruwetti.
34 U buyrughanda, chéketkiler,
san-sanaqsiz hasharetler keldi.
35 Ular zémindiki barliq ot-giyahlarni yep ketti,
étizlarning hosullirini yutup tügetti.
36 U ularning zéminidiki hemme tunji tughulghanlarni,
ularning küchlük chéghida tapqan tünjilirining hemmisini öltürüwetti.
37 U Isra’ilni nurghun altun-kümüshler bilen chiqardi.
Uning qebililirining héchbiri yiqilip chüshmidi.
38 Ularning chiqip ketkinige Misirliqlar xushal boldi,
chünki ular Isra’ildin qorqup wehimige chüshkenidi.
39 U bir bulutni sayiwen qilip yaydi,
kéchisi yoruqluq béridighan bir ot berdi.
40 Ular yalwurghanda, U bödünilerni ewetip berdi,
samawi nan bilen ularni toydurdi.
41 U qoram tashni yarghanda, sular bulduqlap chiqip,
qaqasliqta deryadek aqti.
42 Chünki U xizmetkari Ibrahimgha qilghan
muqeddes wedisini yadigha aldi.
43 U Öz xelqini xushalliq bilen,
Öz tallighanlirini tentene bilen azadliqqa chiqardi.
44 U ulargha ellerning zéminlirini berdi.
Ular xelqlerning méhnitining méwisige ige boldi.
45 Bu ularning Perwerdigarning belgilimilirige boysunup,
qanunlirini ijra qilish üchün idi.
Perwerdigargha hemdusanalar bolsun!